Posts in "me"

13. January 2019

2018

2018 ကိုပြန်ကြည့်ရင် ဘာမှထွေထွေထူးထူး အပြောင်းအလဲ သိပ်မရှိခဲ့ဘူး။ အလုပ်နဲ့ပတ်သတ်ပြီး အပြောင်းအလဲဖြစ်ဖို့ အထပ်ထပ်အခါခါ အတော်လေးနီးစပ်မှုရှိခဲ့ပေမယ့် အကြောင်းကြောင်းတွေကြောင့် အထမမြောက်ခဲ့ဘူး။ ပုံမှန်လည်ပတ်နေတဲ့ အခြေအနေတွေထဲမှာပဲ ကောင်းမယ်ထင်လို့ ပြုပြင်လိုက်တာတွေရှိသလို မကောင်းမှန်းသိရက်နဲ့ လုပ်ချင်လို့ဆက်လုပ်နေတာတွေနဲ့ ကုန်ဆုံးခဲ့တယ်။ ပြီးခဲ့တဲ့နှစ်ရဲ့ သုံးပုံနှစ်ပုံလောက်က အလုပ်တွေနဲ့ အသည်းအသန်လုံးပန်းရင်း ဖြတ်သန်းခဲ့တယ်။ ကျန်တဲ့ တစ်ပုံလောက်မှာ အပြင်အလုပ်တွေ လုံးဝရပ်ပစ်လိုက်လို့ ကိုယ်ပိုင်အချိန်တွေ ပိုထွက်လာခဲ့တယ်။ အဲ့တော့မှ ကိုယ်လုပ်ချင်တာတွေ လုပ်ဖို့အချိန်ရလာပြီး စိတ်တော့အတော်ချမ်းသာသွားတာ အမှန်ပဲ။ တစ်ခါတစ်လေ ကိုယ်လုပ်ရမယ့်အရာတွေရှိလို့ လုပ်ချင်တာတွေ ဘေးချိတ်ထားရတယ်ဆိုရင် ပထမဆုံး မကျေမနပ်ဖြစ်မိတာက ကိုယ့်ကိုယ်ကိုပဲကိုး။

[...]

04. January 2019

ပြည်သို့

နှစ်ကုန်ပိုင်း ခရီးသွားဖို့ အစောကြီးထဲက စီစဉ်ထားပေမယ့် ထုံးစံအတိုင်း အနားကပ်တော့မှ ဘယ်သွားမလဲ တိုင်ပင်ဖြစ်ကြတယ်။ စစချင်း ချောင်းသာ သွားကြမယ်ဆိုပြီး ဟိုတယ်တွေ လိုက်စုံစမ်းကြည့်တော့ ပြည့်ကုန်တာများတယ်။ သွားမယ့်ရက်ကလည်း New Year ရက်တွေဆိုတော့ Booking တွေပြည့်ကုန်တာ မဆန်းဘူး။ ဒါနဲ့ ကျိုက်ထီးရိုး တစ်ရက်သွားမယ် အပြန် သုဝဏ္ဏဘုမ္မိ မှာ သွားတည်းကြမယ်ဆိုပြန်တော့လည်း ထူးမခြားနားပါပဲ။ ကပ်မှ Booking လိုက်လုပ်တော့ လူသွားများတဲ့ နေရာတွေ တော်တော်များများက ပြည့်ကုန်ကြပီပေါ့။ ဒါနဲ့ပဲ လူသွားနည်းတဲ့ ပြည်ဘက်ကို သွားမယ်ဆိုပြီး ဟိုတယ် Booking လုပ်ကြည့်တော့ လျောလျောလျူလျူရတာနဲ့ အတည်ဖြစ်သွားတော့တယ်။ တခြားသူငယ်ချင်းတွေနဲ့ ရုံးကလူတွေကို ပြည်ကိုသွားမယ်ပြောပြတော့ ဘာမှလည်း မရှိပဲ ဘာသွားလုပ်မလို့လဲ မေးကြတယ်။ တကယ်တော့ သွားမယ့်လူလေးယောက်မှာ သူငယ်ချင်းတစ်ယောက်ရဲ့ အဖေကလည်း ပြည်က၊ အမေ့ဘက်က ကိုယ့်အဖိုးအရင်းခေါက်ခေါက်ကလည်း ပြည်ဘက်ကပဲ။ သူငယ်ချင်းကတော့ ရောက်ဖူးပေမယ့် ကိုယ်က တစ်ခါမှ မရောက်ဖူးသေးတဲ့အပြင် အကောက်တောင်ဘက်လည်း သွားချင်နေတာနဲ့ ပြည်ကိုရွေးလိုက်တာ အတော်အဆင်ပြေသွားတယ်။

[...]

17. April 2018

ပုဂံသို့

အထက်တန်းကျောင်းထဲက ငယ်သူငယ်ချင်းတွေနဲ့ ခရီးသွားဖို့ စီစဉ်ခဲ့တာ တစ်နှစ်ကျော် နှစ်နှစ်နီးပါးလောက်ကြာနေပြီ။ ကိုယ်အားတော့ သူတို့ကမအား သူတို့အားတော့ ကိုယ်ကမအား အဲလိုအကြောင်းအကျိုးမတိုက်ဆိုင်တာနဲ့ပဲ တော်တော်အချိန်ကြာသွားတယ်။ အပတ်တိုင်းနီးပါးလောက် တွေ့ဖြစ်ကြပေမယ့် တစ်ခါမှ မယ်မယ်ရရ ခရီးမသွားဖြစ်ကြသေးဘူးဆိုတော့ ဒီတစ်ခေါက်မှာ မဖြစ်ဖြစ်အောင် စီစဉ်မယ်၊ မရရအောင်သွားကြမယ်ဆိုပြီး လုံးပမ်းလိုက်တာနဲ့ပဲ ပုဂံကိုရောက်ဖြစ်ပါတယ်။ စီစဉ်ပြန်တော့လည်း budget trip လိုမျိုး စရိတ်စက အနည်းဆုံးဖြစ်အောင်သွားမယ် ဆိုပြီး နှစ်ညအိပ်သုံးရက်ကို တစ်သိန်းပတ်ဝန်းကျင်နဲ့ တတ်နိုင်သမျှ အဲဒီထက်မကျော်အောင် စီစဉ်ဖြစ်တယ်။

[...]

01. January 2018

2017

အချိန်ကုန်တာ မြန်လွန်းတော့ တစ်နှစ်တစ်နှစ်က ခဏလေးလိုပဲ။ မနှစ်က 2016 ဆိုပြီး ရေးခဲ့တာတောင် မနေ့တနေ့ကလိုပဲ ထင်ရတယ်။ ဒါပေမယ့် အချိန်ဆိုတာ သူ့ဘာသာ သူ့ပုံမှန်နှုန်းနဲ့ လည်ပတ်နေတာဆိုတော့ နှေးတယ်မြန်တယ်ဆိုတာလည်း ကာယကံရှင်ရဲ့ ဂရုပြုမှု မပြုမှု နဲ့ပဲ သက်ဆိုင်ပါတယ်။ ထားပါတော့။ နှစ်ကုန်ခါနီးတိုင်း တစ်နှစ်စာ ကိုယ့်ဘာသာ မှတ်တမ်းတစ်ခုလို ဒိုင်ယာရီတစ်ခုလို မှတ်ထားချင်တာရယ်၊ ဘာတွေတိုးတက်လာပြီး ဘာတွေဆုတ်ယုတ်သွားလည်း ပြန်ချိန်ထိုးချင်တာရယ်ကြောင့် ဒီနှစ်အတွက်လည်း ထပ်ရေးဖြစ်ပါတယ်။

[...]

27. September 2017

Debit Card

Blog domain expired ဖြစ်တော့မယ်ဆိုတော့ extend လုပ်ဖို့အတွက် ကဒ်ထဲမှာလည်း ငွေလက်ကျန်မရှိတော့ဘူးဆိုတော့ ဘဏ်ကိုတစ်ခါသွားရသေးတယ်။ ကဒ်က KBZ ရဲ့ Master Debit Card ပါ။ အရင်တစ်ခေါက်ငွေထည့်တုန်းကလည်း USD နဲ့ထည့်ရတာဆိုတော့ တကူးတကကို USD ပဲယူသွားကာမှ အခုကျ MMK ပဲလက်ခံတော့တယ်ဆိုတော့ နောက်တစ်ခေါက် ဘဏ်ထပ်သွားရမှာ ပျင်းတာနဲ့ အဲ့မှာပဲ ငွေတစ်ခါတည်းလဲပြီး ကဒ်ထဲထည့်လိုက်တယ်။ ရောက်လက်စနဲ့ Mobile Banking ကနေ တစ်ခါတည်းတန်းပြီး ဖြည့်လို့ရလားဆိုကို မေးဖို့မေ့သွားတယ်။ ရတယ်ဆိုရင်တော့ ခဏခဏ ဘဏ်ကိုသွားစရာ မလိုတော့ပဲ အတော်သက်သာသွားပြီ။

[...]